Katrín Júlíusdóttir

Aftur af stað?

2011-06-04T11:58:00.001Z

Vegna fjölda áskorana (einkum innan fjölskyldunnar) er ég búin að virkja þetta blogg aftur. Sjáum hvað gerist ;)

Hef opnað nýjan vef

2006-10-13T11:28:00.000Z

Endilega kíkið við á nýja vefsvæðið mitt!

www.katrinjul.is

Gef kost á mér í 2. sæti Samfylkingarinnar í Suðvesturkjördæmi!

2006-09-21T15:21:00.000Z

Ákveðið hefur verið að velja á framboðslista Samfylkingarinnar í Suðvesturkjördæmi með stuðningsmannaprófkjöri þann 4.nóvember n.k. Fyrirsjáanlegar eru þónokkrar mannabreytingar þar sem leiðtogar jafnaðarmanna til margra ára hér í kjördæminu þau Guðmundur Árni Stefánsson og Rannveig Guðmundsdóttir gefa ekki kost á sér til setu á Alþingi að nýju.

Ég hef því ákveðið að gefa kost á mér í 2. sæti framboðslistans fyrir næstu alþingiskosningar. Ég hef setið á Alþingi síðan 2003. Fram að þeim tíma hafði ég sinnt fjölmörgum trúnaðarstörfum innan jafnaðarmannahreyfingarinnar. Sat m.a. í framkvæmdastjórn Samfylkingarinnar á árunum 2000 – 2003 þar af sem varaformaður frá 2001-2003 og var formaður Ungra jafnaðarmanna – ungliðahreyfingar Samfylkingarinnar 2000-2001. Auk þessa sat ég í stjórn Evrópusamtakanna um nokkurra ára skeið, sat í háskóla- og stúdentaráði fyrir Röskvu frá 1997 til 1999 og starfaði sem framkvæmdastjóri stúdentaráðs 1998 – 1999. Áður en ég hóf störf á Alþingi starfaði ég sem verkefnastjóri og ráðgjafi hjá hugbúnaðarhúsinu Innn hf. um þriggja ára skeið. Áður hafði ég starfað sem innkaupastjóri og síðar framkvæmdastjóri hjá heildverslun í verslunarrekstri.

Í störfum mínum á Alþingi hef ég barist fyrir bættum lífskjörum barnafjölskyldna sem núverandi ríkisstjórn hefur markvisst rýrt á undanförnum árum. Ég hef barist fyrir bættum kjörum eldri borgara, námsmanna og öryrkja. Ég hef barist fyrir kröftugri uppbyggingu í menntakerfinu. Ég hef barist fyrir auðlindum í þjóðareign. Ég hef barist fyrir aukinni samvinnu við Evrópu með fulla aðild að ESB í huga. Þá hef ég barist gegn vaxandi misskiptingu sem birtist í misskiptum kaupmætti og misskiptum skattalækkunum, þar sem þeir allra tekjuhæstu hafa fengið allra mest. Þessari misskiptingu verður að linna. Ég býð fram krafta mína til áframhaldandi starfa í baráttu okkar jafnaðarmanna fyrir sanngjörnu og góðu samfélagi.

Billegar yfirlýsingar og misskipting

2006-09-12T14:58:00.000Z

Ég var í viðtali í Íslandi í bítíð í gær með Guðlaugi Þór Þórðarsyni þingmanni Sjálfstæðisflokksins. Guðlaugur er einn þeirra sjalla sem trúir í blindni á þá hugmynd að ef lygi er sögð nógu oft verði hún sönn. Þannig hélt hann því fram (og það ekki í fyrsta sinn) að ef stjórnarandstöðuflokkarnir tækju hér við landsstjórninni eftir næstu kosningar þýddi það skattahækkanir og óstjórn í efnhagsmálum. Þetta er í besta falli hlægileg staðhæfing í ljósi þess að sýnt hefur verið framá að skattbyrði hefur verið aukin svo um munar í tíð þessarar ríkisstjórnar. Eini hópurinn sem ekki hefur fengið hækkaða skattbyrði heldur lækkaða er 10%-in sem hæstar hafa tekjurnar. Þetta hefur verið staðfest í svari frá fjármálaráðherra við fyrirspurn Rannveigar Guðmundsdóttur í þinginu. Sjá svarið hér

Varðandi óstjórn í efnahagsmálum. Þá er Guðlaugur Þór á ansi hálum ís að halda því fram að önnur ríkisstjórn en sú sem nú situr myndi kalla yfir okkur óstjórn í efnhagsmálum. Þetta segir Guðlaugur á sama tíma og viðskiptahallinn er að slá hvert metið á fætur öðru (væri vert að kanna hvort ekki sé um heimsmet að ræða) og er hann sá hæsti innan OECD ríkjanna. Hér er bullandi verðbólga sem hefur hrikaleg áhrif á húsnæðislánin sem bólgna nú út vegna verðtryggingarinnar á meðan lítil hreyfing er á fasteignum og fasteignaverði. Krónunni hefur verið líkt við korktappa úti á ólgusjó og hafa sveiflurnar farið í 40% - það þarf ekki að fara yfir það hvað þetta þýðir fyrir útflutningsgreinarnar og vöruverð í landinu. Svona er hægt að halda endalaust áfram í yfirferð yfir afleiðingar efnhagsstjórnar ríkisstjórnar Sjálfstæðis- og Framsóknarflokks: allsstaðar blasa mistökin við. Af mistökunum súpa Íslendingar nú seyðið og greiða m.a. fjórum sinnum hærri vexti en í Evrópu og tugum prósenta hærra verð fyrir nauðsynjavörur auk þess að horfa nú á eign sína í íbúðarhúsnæði sínu skreppa saman dag frá degi - ævisparnaður unga fólksins sem það hefur lagt í húsnæði minnkar dag frá degi.

Hægt að lækka matarverð á morgun
Merkilegt fannst mér líka hvað Guðlaugur var brattur þegar hann lýsti því yfir að ekkert mál væri að lækka matarverð á morgun. Voru þetta viðbrögð hans við því að ég var að ræða um stórlækkun matarverðs í Svíþjóð eftir að svíar gengu inn í ESB. Í hvaða flokki hefur Guðlaugur eiginlega verið? Sjálfstæðisflokkurinn hefur stjórnað landinu í bráðum 12 ár með Framsóknarflokknum og ekki hreyft litla fingur til að lækka matarverð hér á landi. Þessir flokkar hafa haft alla möguleika í hendi sér að lækka matarverðið en ekki gert það. Lofaði ekki Sjálfstæðisflokkurinn því að lækka matarskattinn á þessu kjörtímabili – það loforð hefur ekki verið efnt. Í ljósi þessa finnast mér yfirlýsingar hans billegar og bera það eina merki að Guðlaugur sé á leið í prófkjör – engin merki eru nefnilega á lofti um að þessi ríkisstjórn muni standa fyrir aðgerðum til lækkunar á matarverði nú frekar en fyrri daginn.

Ekki vil ég nú bara draga fram neikvæðar hliðar viðtalsins því eitt sagði Guðlaugur Þór sem má hrósa honum fyrir og það er að hann tók undir það að hér á landi væri misskipting og sagði: "Það liggur alveg fyrir að það er misskipting" – og jánkaði því auðvitað að enda væri Sjálfstæðisflokkurinn ekki jafnaðarmannaflokkur.

"Velferðarstjórn" Framsóknarflokksins

2006-09-12T11:04:00.000Z

Á nýliðnu flokksþingi Framsóknarflokksins hélt Halldór Ásgrímsson sína síðustu yfirlitsræðu sem formaður þess flokks. Orð sem hann lét þar falla hafa staðið nokkuð í mér. Í ræðunni fullyrti Halldór nefnilega að velferðarstjórn væri réttnefni á stjórnarsamstarfi Framsóknar- og Sjálfstæðisflokks. Ekki veit ég hvort Halldór hafi verið að slá á létta strengi svona í lok ferils síns eða hvort framsóknarmenn séu svona illa haldnir af ranghugmyndum því ekki hafa verk ríkisstjórnarinnar gefið til kynna að þar fari velferðarstjórn. Hið síðara er öllu verra því það gefur okkur fyrirheit um það sem koma skal haldi samstarf þessara flokka áfram – fyrirheit um áframhaldandi misskiptingu.

Velferð hinna fáu
Mér þykir illa farið með hugtakið velferðarstjórn þegar það er notað í samhengi við ríkisstjórn Sjálfstæðis- og Framsóknarflokks því aldrei hefur ójöfnuðurinn verið meiri í íslensku samfélagi en einmitt nú eftir áralanga stjórnarsetu þessara flokka eins og Ingibjörg Sólrún Gísladóttir formaður Samfylkingarinnar hefur ítrekað bent á. Eftir þessa ríkisstjórn stendur nefnilega samfélag þar sem ójöfnuðurinn er orðinn hrópandi og getur ekki dulist nokkrum manni. Afleiðingar stjórnvaldsaðgerða þessarar ríkisstjórnar bera ekki velferðarstjórn nokkuð vitni nema þá kannski velferð hinna fáu.

Misskiptingarstjórnin
Eftir þessa ríkisstjórn stendur misskipting – misskiptingarstjórn er því réttnefni yfir þessa ríkisstjórn. Misskiptingunni hefur að stórum hluta verið stýrt í gegnum skattkerfið en með markvissum aðgerðum hefur ríkisstjórnin lækkað skatta á þá sem hafa allra hæstu tekjurnar á meðan skattbyrði á hin 90% heimilanna í landinu hefur hækkað – þá allra mest hjá hinum tekjulægstu. Þessar upplýsingar liggja allar fyrir. Þá hafa vaxtabætur og barnabætur verið skertar á sama tíma. Þetta þýðir að sú aukning kaupmáttar sem ríkisstjórnin hefur barið sér á brjóst fyrir hefur misskipst þannig að aukningin er 27% hjá lágtekjuhópunum - jafnvel enn lægri á lífeyrisþegum- en 78% hjá þeim allra tekjuhæstu. Þetta eru ekki ummerki velferðarstjórnar heldur misskiptingarstjórnar.

Tvöfalt heilbrigðiskerfi
Afleiðingar verka þessarar ríkisstjórnar misskiptingar koma harkalega niður á fjölskyldum í landinu. Aldrei hefur verið jafn dýrt að koma sér upp þaki yfir höfuðið. Og nú er verðbólgan í tæpum 9% vegna efnahagsmistaka þessarar ríkisstjórnar. Unga fólkið sem öllu var lofað fyrir síðustu kosningar horfir því uppá húsnæðislánin bólgna út dag frá degi með tilheyrandi lífskjararýrnun. Vextir eru margfalt hærri hér en í nágrannalöndunum og verðlag á nauðsynjavörum er tugum prósenta hærri hér en í nágrannalöndunum eftir 11 ára stjórnarsamstarf Framsóknar- og Sjálfstæðisflokks. Stór hluti eldri borgara og öryrkjar þurfa að lifa á skammarlega lágum launum sem í ofanálag þeir þurfa að greiða skatt af vegna þess að misskiptingastjórnin frysti skattleysismörkin á meðan hún lækkaði skattana á þá sem hafa allra hæstu tekjurnar í landinu. Og nú hefur ríkisstjórnin með Siv Friðleifsdóttir heilbrigðisráðherra í broddi fylkingar staðfest með reglugerð vísi að tvöföldu heilbrigðiskerfi. Því nú eru hjartalæknar utan samninga og geta sjúklingar borgað sig framfyrir og sloppið við tafsamt tilvísanakerfi hafi þeir efni á því. Þetta eru ekki ummerki velferðarstjórnar heldur misskiptingarstjórnar.

Af þessu er ljóst að Framsóknarflokkurinn er stefnulaust rekald og alls ekki til þess bær að vera við stjórnvölinn áfram.

Greinin birtist í Blaðinu í dag

Að flýja sökkvandi skip

2006-06-14T20:49:00.000Z

Mannabreytingar hjá hægri stjórninni sem nú situr sitt þriðja og vonandi síðasta kjörtímabil hafa verið afar tíðar að undanförnu. Má segja að flótti sé brostinn á liðið. Þeir flýja sökkvandi skip einsog rottunar forðum, enda ekki að undra. Fátt annað blasir við fleyinu en botninn. Steininn tók úr þegar formaður Framsóknar elti Árna krónprins. Nú vinna þeir bráðum báðir í banka. Halldór í seðla og Árni í alvöru.
Á meðan þessar breytingar allar hafa átt sér stað hefur ríkisstjórnin gerst sek um mikla vanrækslu við stjórn landsins sem birtist nú í hækkandi verðbólgu og óskýrri framtíð fjölmargra lykilstofnana. Þessi ríkisstjórn hefur sýnt það aftur og aftur að hún situr ekki til að gera þjóðfélaginu gagn heldur snýst hún eingöngu í kringum sjálfa sig og völdin. Og við borgum síðan brúsann eftir þetta tilgangslausa brölt. Almannahagsmunir eru fyrir borð bornir enda stólar handa fimm prósent Framókn málið. Helmingaskipti um bitlinga og völd. Út á það gengur hægri stjórnin.

Frekari ráðherrabreytingar í ágúst?
Á síðustu þremur árum hafa verið hér fjórir utanríkisráðherra, þrír forsætis-, umhverfis-, og félagsmálaráðherrar, tveir fjármála-, iðnaðar- og viðskipta-, heilbrigðis- og trygginga-, menntamála-, og sjávarútvegsráðherrar. Í slíkum hringlanda er ekki hægt að gera ráð fyrir því að mikið verk vinnist og sjáum við þess nú merki víða í samfélaginu að hér hefur ekki verið stöðug stjórn á mikilvægum málum. Nú hefur Framsóknarflokkurinn ákveðið að kosin verði ný forysta í ágúst. Valgerður Sverrisdóttir sem tekur senn við ráðuneyti utanríkismála hefur líst því yfir að hún sækist ekki eftir formennsku í flokknum. Því má gera ráð fyrir að nýr formaður muni falast eftir utanríkisráðherrasætinu eða trúir einhver að Guðni muni sitja áfram í landbúnaðarráðuneytinu og láta Valgerði utanríkismálin eftir ef hann verður kjörinn formaður í ágúst? Nei, hver sá sem kjörinn verður mun vilja setjast í stól utanríkisráðherra og því tel ég nokkuð ljóst að enn verði hrókerað í ágúst og að fimmti utanríkisráðherrann á kjörtímabilinu taki við. Sem hlýtur að slá allnokkur met!

Stórir hópar súpa seyðið af vanrækslunni
Á meðan ríkisstjórnin snýst í kringum sjálfa sig þá er verðbólgan hér á bullandi siglingu uppávið. Stórir hópar súpa nú seyðið af hringlandanum í ríkisstjórninni. Fjölskyldur þessa lands sem eru með miklar skuldir vegna húsnæðislána súpa seyðið af þessari vanrækslu í gegnum verðtrygginguna. Lánin bólgna út og verðbólgan étur upp eignir þessa fólks. Þessi ríkisstjórn hefur ekki sinnt efnahagsmálunum og því er nú svona komið. Eldri borgarar súpa seyðið af aðgerðaleysi þessarar ríkistjórnar og er stór hópur þeirra fastur í fátæktargildru tryggingakerfisins. Hækkuð skattbyrði og frosin skattleysismörk hafa komið harkalega niður á eldri borgurum. Þessi ríkisstjórn vinnur ekki fyrir fólkið í landinu en hikar ekki við að halda því fram að hér ríki stöðugleiki og að skattbyrði allra hópa hafi lækkað! Þetta eru hrein og klár ósannindi sem þessir hópar finna glöggt á eigin skinni.

Ærin verkefni jafnaðarmanna
Verkefnin sem bíða okkar jafnaðarmanna eftir næstu kosningar eru ærin eins og formaður Samfylkingarinnar fór yfir í ræðu á flokkstjórnarfundi okkar um helgina. Skora ég á alla þá sem finna fyrir þessari vanrækslu ríkisstjórnarinnar á eigin skinni að koma með okkur í það mikilvæga verkefni byrja að byggja upp raunverulegan stöðugleika og jöfnuð. Það er kominn tími til að gefa þessari ríkisstjórn frí því hún er gjörsamlega þrotin af kröftum og hugmyndum. Eini valkosturinn er öflug Samfylking. Annars situr valdabandalag hægri flokkanna áfram. Og áfram.

Klaufalegar eftirlíkingar sjálfstæðismanna!

2006-05-25T12:42:00.000Z

Fyrir þessar kosningar vilja allir flokkar vera vera jafnaðarmenn. Meira að segja svartasta íhaldið er orðið bleikt og farið að reyna að selja sig sem flokk sem skilur mikilvægi ýmissa samfélagslegra verkefna. Öðruvísi mér áður brá! En kosningaloforð Sjálfstæðisflokksins verða seint kölluð annað en klaufalegar eftirlíkingar úr stefnu okkar jafnaðarmanna, jafnvel skrumskælingar. Það er svo skrítið hvað hægrimennirnir verða alltaf hlægilegir þegar þeir korteri fyrir kosningar gerast sósíalistar. Eitthvað svo raunarlega trist við það. Meira að segja svartasta íhaldið yst af hægri kantinum ramblar upp úr rullunni einsog gamall Maóisti.

Jafnaðarmenn byggðu upp leikskólana
Þessi staðreynd kristallast best í loforðum Sjálfstæðisflokksins í málefnum leikskólans. Það er nefnilega staðreynd að það vorum við jafnaðarmenn sem bjuggum leikskólastigið til. Næsta verkefni er að gera leikskólann gjaldfrjálsan og brúa bilið milli fæðingarorlofs og leikskólans. Tillögum okkar um gjaldfrjálsan leikskóla svarar íhaldið með loforðum um afslætti. Tillögum okkar um hvernig brúa á bilið milli fæðingarorlofs og leikskóla svarar íhaldið með vöggustofum.

Gjaldfrelsi vs. afsláttur
Auðvitað er ekki hægt að taka íhaldið alvarlega í þessum efnum því stutt er síðan sjálfstæðismenn vildu frekar senda konur heim með börnin og nokkrar krónur frá sveitarfélaginu en að stofna leikskóla. Samfylkingin hefur unnið að eflingu leikskólastigsins af heilum hug frá því að Reykjavíkurlistinn tók við rústunum í Reykjavík. Árangurinn blasir við okkur en enn er verk að vinna. Nú ætlar Samfylkingin um allt land að gera leikskólann gjaldfrjálsan því það er ekkert réttlæti í því að borgað sé miklu meira í skólagjöld með litlu börnunum en gert er í einkareknum háskólum landsins. Afslættir sjálfstæðismanna eru einungis klaufaleg eftirlíking.

Felldu tillögu um lækkun leikskólagjalda
Að hlusta á sjálfstæðismenn fara í gervi jafnaðarmanna í kosningabaráttunni er samt dáldið krúttlegt á köflum því svo klaufalegt er það. Í mínum heimabæ Kópavogi hefur Sjálfstæðisflokkurinn kúvent í stefnu sinni í málefnum leikskólanna og lofar m.a. afslætti af skólagjöldum. Hljómar það eins og lygasaga í ljósi þess að einungis eru nokkrir mánuðir síðan að sjálfstæðis- og framsóknarmenn felldu tillögu Samfylkingarinnar um lækkun leikskólagjalda í Kópavogi. Og stutt er síðan að Gunnar Birgisson bæjarstjóri í Kópavogi hellti sér yfir borgarstjórann í Reykjavík fyrir að hækka laun leikskólastarfsmanna og fullyrti að við það myndi efnahagslífið fara á hliðina!

Vöggustofur eru úreld gæsluúrræði
Kosningaloforð sjálfstæðismanna um vöggustofurnar er algjört met. Líklega eiga þeir við það sem við jafnaðarmenn köllum ungbarnadeildir á leikskólum. Við samfylkingarfólk höfum lengi barist fyrir öruggum dagvistunarúrræðum fyrir yngstu börnin og eru vöggustofur svar íhaldsins við því nú fyrir þessar kosningar. Hvaðan hugmyndin að vöggustofum íhaldsins er komin skal ósagt látið en um vöggustofur er fjallað í Atómstöðinni eftir Nóbelsskáldið og segir Búi Árland í bókinni góðu þegar kallað er eftir vöggustofu: „Æjá því miður erum við á móti kommúnisma.“ Vöggustofur íhaldsins nú árið 2006 eru nefnilega gamalt gæsluúrræði kennt við kommúnista frá því snemma á síðustu öld og eiga lítið skylt við nútímadagvistunarúrræði.

Ég hvet kjósendur til að kjósa Samfylkinguna en ekki skrumskælda eftirlíkingu!

Ísland í ESB!

2006-02-24T12:03:00.000Z

- grein birtist í Blaðinu 24.febrúar 2006

Mikið þótti mér spádómur Halldórs Ásgrímssonar forsætisráðherra ágætur þegar hann spáði því fyrir skömmu að Ísland yrði orðinn fullgildur aðili innan Evrópusambandsins árið 2015. Hefði ég ekki trúað því fram að þessu að framtíðarsýn framsóknarmanns hugnaðist mér svo að við mér hreyfði. Gárungar hafa slegið því fram að með þessu hafi formaður Framsóknarflokksins verið að spá góðu gengi Samfylkingarinnar í stjórnmálum á næstu árum og forystu Samfylkingarinnar í ríkisstjórn eftir næstu kosningar. Undir þetta er hægt að taka vegna þess að Samfylkingin er eini stjórnmálaflokkurinn á Íslandi sem hefur umsókn um aðild Íslands að Evrópusambandinu á sinni stefnuskrá.

Lægra matarverð – bætt lífskjör
Aðild okkar að Evrópusambandinu og myntbandalagi Evrópu yrði íslenskri þjóð til mikilla heilla og myndi bæta lífskjör hér á landi verulega. Fyrir því eru margar ástæður og ein þeirra sem vegur þyngst er lækkun á verði nauðsynjavara. Matarverð á Íslandi er mjög hátt eins og ítrekað hefur verið dregið fram í dagsljósið af ýmsum aðilum á undanförnum árum, þá ekki síst í skýrslu sem unnin var fyrir forsætisráðherra að beiðni Rannveigar Guðmundsdóttur þingmanns Samfylkingarinnar fyrir nokkrum misserum. Matarverð hér er miklu mun hærra en í ríkjum Evrópusambandsins og greiðum við 42% hærra verð fyrir mat en Evrópuþjóðir gera að meðaltali samkvæmt nýlegri norrænni könnun. Það er samhengi á milli matarverðs og aðildar að Evrópusambandinu ef þróun matarverðs í t.d. Svíþjóð er skoðað fyrir og eftir aðild. Svíar greiddu helmingi hærra verð fyrir matvöru áður en þeir gengu í Evrópusambandið en þeir gera nú. Slík lækkun á matvöru gæti því haft stórkostleg áhrif til bættra lífskjara fjölskyldna hér á landi

Lægri vextir
Spurningin um aðild okkar að Evrópusambandinu og myntbandalaginu er nefnilega spurning um lífskjör. Íslenska krónan sveiflast með slíkum látum að ekki verður mikið lengur við það unað þar sem það hefur veruleg áhrif á fólk og fyrirtæki. Fyrirtæki í útflutningi hafa sviðið á undanförnum árum undan gengissveiflunni og hefur hún haft veruleg áhrif á afkomu margra fyrirtækja s.s. í sjávarútvegi og þekkingariðnaði. Hætta er á að störf í þessum greinum flytjist í auknum mæli til útlanda sem mun stefna fjölbreyttum atvinnutækifærum okkar hér á landi í hættu. Ágúst Ólafur Ágústsson varaformaður Samfylkingarinnar fer yfir það í yfirgripsmikilli grein á vefsíðu sinni frá 9.janúar s.l. hvernig vextir myndu lækka hér á landi við inngöngu, starfsskilyrði íslenskra fyrirtækja batna og kjör neytenda stórbatna vegna aukinnar samkeppni svo fátt eitt sé nefnt. Þetta eru allt þættir sem stjórnmálamenn þurfa að ræða í samhengi við hugsanlega aðild að Evrópusambandinu því það er alveg ljóst að full aðild með upptöku evru getur fært okkur langþráðan stöðugleika og aukna velsæld.

Tökum umræðuna af krafti
Umræðan um aðild Íslands að Evrópusambandinu er að mínu mati sú mikilvægasta í okkar samtíma. Evrópuumræðan þarf nú að fara fram af krafti á næstu misserum. Það eru margar knýjandi spurningar sem við verðum að svara í þeim efnum því við getum ekki haldið áfram að stinga höfðinu í sandinn og látið telja okkur trú um að við eigum ekkert erindi inn í Evrópusambandið eins og Sjálfstæðismenn með stuðningi Framsóknarmanna hafa komist upp með alltof lengi. Of miklir hagsmunir eru í húfi.

Réttur barnanna hundsaður

2006-02-09T15:34:00.000Z

Umræður voru á alþingi í gær um galla á fæðingarorlofslögunum (nánartiltekið 18.gr.), þar sem foreldrar barna sem tímabundið hafa flutt lögheimili sitt vegna náms á erlendri grund hafa ekki sama rétt til fæðingarorlofs og aðrir foreldrar. Vandinn er sá að maki námsmanns á erlendri grundu fær ekki fæðingarstyrk frá Íslandi og í mörgum löndum t.d. Danmörku þar sem fjölmargir Íslendingar stunda nám, fá erlendir ríkisborgarar ekki fæðingarstyrk við þessar aðstæður. Annað foreldrið dettur því á milli kerfa sem hefur verulega áhrif á fjölskylduna og barnið.

Árni Magnússon, félagsmálaráðherra, tók þátt í umræðunni og svaraði því til að þetta væri flókið mál að leysa og snérist m.a. um jafnræðisreglu stjórnarskrárinnar. Ég varð nokkuð hlessa á kerfiskallalegu svarinu og afar sérkennilegri nálgun ráðherrans þar sem hann talaði mikið um hinn sjálfstæða rétt foreldranna sem ekki væri háð hinu og svo framvegis... - lesa ræðu ráðherra hér. Í ræðu sinni fjallaði Árni um málið eins og um sérstaka lúxusþjónustu við foreldra væri um að ræða. Svo er bara alls ekki.

Jafnræðisreglan og börnin

Svar Árna gefur til kynna að hann sé fallinn frá því markmiði sem lagt var upp með við setningu fæðingarorlofslaganna og kveðið er á um í 2.grein laganna þar sem segir "Markmið laga þessara er að tryggja barni samvistir bæði við föður og móður." Nálgun Árna snýst alfarið um foreldrana og réttur þeirra mátaður við jafnræðisreglu stjórnarskrárinnar. En hvergi var í ræðu Árna minnst á blessuð börnin sem þetta snýst nú allt saman um.

Mér þykir því eðlilegt að spyrja hvað með rétt barnanna til umönnunar af hálfu beggja foreldra fyrstu mánuði lífs síns?

Börn íslenskra ríkisborgara sem stunda nám erlendis sitja ekki við sama borð og önnur börn íslenskra ríkisborgara þar sem þau fá einungis tryggða umönnun annars foreldris - snertir það ekki jafnræðisregluna?

Hver er staða barna gagnvart stjórnarskránni? Er hún ekki sú sama og fullorðinna? Ég hefði nú haldið það að börn ættu sinn rétt varinn í stjórnarskrá. Árni virtist ekkert huga að því.

Fókus Árna er allt annar en lagt var upp með við setningu laganna. Það veldur mér verulegum áhyggjum því hann er samkvæmt svari sínu í gær komin langt útaf sporinu. Við eigum að nálgast þessi mál útfrá barninu og hvað því er fyrir bestu - réttur barnsins á að vera í fyrsta, öðru og þriðja sæti!

Mál til að leysa
Ég held að félagsmálaráðherra verði að endurskoða hug sinn og ganga í að leysa mál þessara fjölskyldna hið allra fyrsta. Fæðing barns á að vera dásamlegur tími í lífi hverrar fjölskyldu en ekki tími þar sem kvíði vegna afkomu skyggir á alla gleði. Auk þess getur þessi ráðstöfun eins og hún er nú valdið því að fjölskyldur þurfa að fara á lögheimilisflakk eða hreinlega sundrast á þessum viðkvæmu og mikilvægu tímum í lífi hverrar fjölskyldu og lífi barnanna.

Til að tryggja megi þessum börnum sama rétt og öðrum börnum íslenskra ríkisborgara tel ég rétt að þessum foreldrum verði veitt undanþága þar til breyting á lögunum gengur í gegn sem dregur þetta óréttlæti til baka.
__________________________________________________

Til viðbótar:

Við erum aðilar að barnasáttmála S.Þ. þar sem segir í 3. gr. 1. "Það sem barni er fyrir bestu skal ávallt hafa forgang þegar félagsmálastofnanir á vegum hins opinbera eða einkaaðila, dómstólar, stjórnvöld eða löggjafarstofnanir gera ráðstafanir sem varða börn." Auk fleiri greina sem kveða á um rétt barna.

"Ég á rétt á að vera með bæði mömmu og pabba": segir á heimasíðu umboðsmanns barna um réttindi 0-7 ára barna.

Ræða KJúl um málið á alþingi 8.febrúar 2006

Gulli með frábært kombakk

2006-01-25T11:46:00.000Z

Um nokkurt skeið hefur það verið sérstakt áhugamál mitt að fylgjast með ræðum Guðlaugs Þ. Þórðarssonar þingmanns Sjálfstæðisflokksins og borgarfulltrúa í Reykjavík fyrir sama flokk - í þinginu. Ástæðan er sú að hann er einstaklega laginn við að snúa ræðum um hin ýmsu mál upp í ræðu um Reykjavíkurborg og Reykjavíkurlistann. Hann er með rólegan aðdraganda að því en bamm áður en þú veist af þá er ræðan hans farin að snúast um stjórnvöld í Reykjavík. Þá er gaman að því hvernig ræður hans geta tekið U-beygju ef hann bara sér Ingibjörgu Sólrúnu ganga í þingsal þegar hann er í miðri ræðu.

Það hefur þó farið lítið fyrir þessu hjá Guðlaugi nú í haust. Það er sosem ekkert óeðlilegt að hann hætti að tala um stjórnvöld í Reykjavíkurborg í þinginu nú þegar Guðlaugur hefur ákveðið að hætta í borgarstjórn. Því var ég farin að halda að hann hefði látið af þessu fyrir fullt og allt - mér til mikilla vonbrigða auðvitað því þetta getur verið ævintýralega skemmtilegt.

Því verð ég að viðurkenna að ég gladdist mjög - flissaði og skríkti í sæti mínu - í þingsalnum á mánudagskvöldið í miðjum þungum umræðum um Ríkisútvarpið hf. þegar Guðlaugur tók til máls í andsvari við formann Samfylkingarinnar Ingibjörgu Sólrúnu Gísladóttur. Með meistarlegum töktum sneri hann ræðu sinni frá frumvarpi um Ríkisútvarpið hf. og fór að ræða stjórnunarhætti innan Reykjavíkurborgar. Ég verð að viðurkenna að það heyrðist lítið "Yesss" úr sætinu mínu yfir þessu frábæra kombakki Gulla borgarfulltrúa minnihlutans í Reykjavík í ræðustól alþingis. Hann hélt síðan uppi uppteknum hætti í gær í umræðum um skipan starfshóps um starfsnám á vegum menntamálaráðherra. Þið sjáið kannski ekki tenginguna en það gerir Gulli.

Guðlaugur hefur komið sterkur inn í vikunni með kunnuglega takta sem eru að verða allt að því vinalegir bara. Manni þykir orðið vænt um þetta tuð hans og biturð útí stjórnvöld í Reykjavík. Og svo virðist sem Gulla þyki gott að blása dáldið út kergju og reiði sinni í ræðustól alþingis og því á hann bara að gera það. Við hin getum alveg beðið með umræðuna hverju sinni á meðan.

Heilbrigðir unglingar

2006-01-23T12:45:00.000Z

Fór í bláfjöll á skíði á föstudagskvöldi nú um síðustu helgi. Mikið var það aldeilis frábært alveg, fínt færi og gott skyggni. Gömlu stórsvigsskíðin stóðu vel fyrir sínu. Þau eru 195 á hæð eða 25 c.m. hærri en ég sem þótti nú aldeilis fínt hér á árum áður - þá var best að vera á sem lengstum skíðum ef maður var vanur skíðamaður. Núna hins vegar eru flestir komnir á svokölluð Carverskíði (eða Curver - kann ekki að fara með það) og þau hafa styst talsvert - læt það þó ekki á mig fá heldur skíða ótrauð áfram á lengjunum mínum með beygluðu stafina!

Ég fer líka á snjóbretti og er búin að eiga eitt slíkt - sama brettið - í 18 ár og það stendur sig líka alveg frábærlega. Var búin að gleyma því hversu fljótt svona búnaður "úreldist", það eru heldur betur tískusveiflur í þessu eins og öðru. Tískueltarinn sem þetta skrifar ætlar þó ekki að láta þetta á sig fá og skíðar nú samkvæmt mottóinu: Allt sem er gamalt er gott!

Það vakti þó athygli mína í þessari skíðaferð í bláfjöllin hversu mikið af unglingum þar var saman kominn á föstudagskvöldi - en fólk undir tvítugu var mikill meirihluti gesta. Ungmenni streymdu í fjöllin hvort sem var á skíði eða snjóbretti og mynduðust langar raðir alveg þar til síðasti stóllinn fór upp fyrir lokun. Það geislaði af þeim hreystið og gleðin yfir langþráðri opnun á svæðinu. Þetta fékk mig til að hugsa hversu oft maður heyrir neikvæðar fréttir af unglingum. Af hverju er ekki fjallað um allan þann fjölda unglinga sem streymir í fjöllin til að iðka afar góða og heilbrigða útiveru og það á föstudagskvöldi?!

Það er alltaf fjallað um unglinga eins og þeir séu allir eins og ef einn misstígur sig í 100 manna hópi séu allir hinir í bráðri hættu. Mér finnst umfjöllun um unglinga alltof neikvæð. Unglingar eru ekki allir eins - þeir eru flestir sterkir og heilbrigðir einstaklingar. Um það á að fjalla meira um leið og fjallað er um töfra unglingsáranna sem eru einstakur tími sem kemur ekki aftur.

Íhaldið sefur – Samfylkingin setur leikskólamálin í forgang

2006-01-22T19:14:00.000Z

- grein birt í janúarútgáfu Kópavogsblaðsins

Sofandaháttur bæjaryfirvalda í Kópavogi í málefnum leikskólanna nú í haust hefur verið með hreinum ólíkindum. Foreldrar á nokkrum leikskólum hér í bæ hafa nú í allt haust þurft að vera heima með börnum sínum á nokkurra daga fresti vegna skorts á starfsfólki. Þetta hefur í för með sér mikið rask fyrir börnin, mikið álag á það starfsfólk sem fyrir er á leikskólunum, vinnutap fyrir foreldra og rask fyrir þau fyrirtæki sem foreldrarnir starfa hjá. Íslenskt samfélag krefst þess í dag að báðir foreldrar vinni úti. Leikskólarnir eru hluti af grunnþjónustu sveitarfélaganna og á að vera forgangsmál að hafa þá starfhæfa. Íhaldið og framsókn í Kópavogi virðast þó ekki líta svo á því það er ekki fyrr en mörgum mánuðum eftir að manneklan fór að hafa ofangreind áhrif á starfsemi leikskólanna sem bæjaryfirvöld rumska.

Bæjarstjóri íhaldsins á móti launahækkunum
Starfsmannavelta í leikskólum er alltof mikil. Í desember 2004 var hún samkvæmt upplýsingum á vef hagstofunnar, alls 23%, þar af 30% meðal ófaglærðra og 7% meðal faglærðra leikskólakennara. Til þess að aukinn stöðugleiki verði í rekstri leikskólanna verður að minnka þessa starfsmannaveltu. Tvennt þarf þar að koma til; í fyrsta lagi er löngu tímabært að launin verði hækkuð fyrir þessi störf og í öðru lagi verður að fjölga þeim sem gera störf á leikskólum að ævistarfi. Þessu áttar borgarstjórinn í Reykjavík sig á og hefur því hækkað laun hinna ófaglærðu, hafið viðræður við faglærða um launakjör þeirra og sent menntamálaráðherra bréf og hvatt til þess að fleiri séu teknir inn í leikskólakennaranám. Hvað gerðu bæjaryfirvöld í Kópavogi á meðan með bæjarstjórann Gunnar Birgisson í broddi fylkingar? Nákvæmlega ekkert var gert til að leysa málin hér. Bæjarstjórinn í Kópavogi gagnrýndi harðlega launahækkanirnar í Reykjavík og lýsti sig algerlega mótfallinn þeim.

Menntamálaráðherra íhaldsins sefur þyrnirósarsvefni
Á haustönn 2004 var helmingi umsækjenda um leikskólakennaranám í Kennaraháskólanum vísað frá vegna takmarkaðra fjárheimilda. Í umræðum utandagskrár á alþingi nú í byrjun nóvember kallaði ég eftir því að fleiri yrðu teknir inn í leikskólakennaranámið. Svör menntamálaráðherra gáfu það skýrt til kynna að það væri ekki á dagskrá. Hún sefur því þyrnirósarsvefni líkt og íhaldið í Kópavogi gagnvart málefnum leikskólanna. Eitthvað eru bæjaryfirvöld að rumska nú eftir áramótin þegar ástandið í starfsmannamálum leikskóla Kópavogs hefur enn versnað og hávær mótmæli hafa verið í bænum vegna ástandsins.

Þurfum varanlegar lausnir
Alltof lengi hefur starfsmannavandinn á leikskólunum verið afgangsstærð hér í Kópavogi. Sjálfstæðisflokkurinn hefur bara engan áhuga á þessum málaflokki. Það hefur berlega komið í ljós nú í haust því á meðan vandinn hefur vaxið hefur bæjarstjórinn ekkert gert þó fyrirséð væri að vandinn myndi vaxa enn nú um áramótin. Bæjarstjórinnleggur þó mikla vinnu í undirbúa byggingu nýrra óperu- og íþróttahalla fyrir fleiri milljarða á sama tíma og leikskólabörnin, foreldrar þeirra og starfsmenn leikskólanna búa við vanrækslu af hans hálfu. Það er kominn tími til að varanlegar lausnir verði fundnar í starfsemi leikskólanna, það er ekki nóg að byggja þá það verður að hlú að innra starfinu.

Samfylkingin ætlar að breyta
Í vor verður kosið í sveitarstjórnarkosningum. Ég hvet bæjarbúa til að kjósa þau öfl sem ætla að sinna leikskólamálunum hér og hafa sýnt það í verki. Það hafa bæjarfulltrúar Samfylkingarinnar gert í bæjarstjórn og bæjarráði í allt haust með málflutningi sínum og tillögugerð en talað fyrir daufum eyrum. Það er ekki nóg að rumska rétt fyrir kosningar. Sjálfstæðisflokkurinn og Framsókn hafa stjórnað bænum í 16 ár og hafa á þeim tíma vanrækt skyldur sínar gagnvart öllum þeim sem að leikskólunum koma. Nú er komið nóg. Samfylkingin ætlar að leggja áherslu á bættan aðbúnað leikskólasamfélagsins. Tími Samfylkingarinnar við stjórn bæjarins er kominn.

Æði rennur á íhaldið - en hvar er Geir?

2005-12-21T08:21:00.000Z

- birtist í Blaðinu

Stjórnmálin eru oft furðulegt fyrirbæri. Síðustu mánuði höfum við horft á miklar og harðar árásir margra fjölmiðla og íhaldsins í landinu á Samfylkinguna. Af hverju nú? Jú, ný forysta tók við flokknum í vor og þá var kominn tími fyrir Sjálfstæðisflokkinn og Moggann að endurtaka leikinn frá 2000; Samfylkinguna og hennar forystu skyldi tala niður og gera ótrúverðuga. Össur Skarphéðinsson fékk á sig fordæmalausar árásir sem formaður flokksins á þeim tíma. Hann reyrði upp í háls og lét brimskaflana frá íhaldinu, til hægri og vinstri, ganga yfir sig. Út kom hann sterkur og með flokk sem góður þriðjungur þjóðarinnar studdi. Sama er uppi nú. Ný forysta þarf að standa af sér veðrið og láta ekki hafa áhrif á störf og stefnu. Nú gilda stáltaugarnar.

Innantóm gagnrýni
Forysta Samfylkingarinnar hefur sætt mikilli gagnrýni sem ég tel óverðskuldaða, innantóma og oft á tíðum í litlum tengslum við raunveruleikann. Þegar skipt var um forystu í Samfylkingunni síðastliðið vor rann gamla æðið á Sjálfstæðisflokkinn sem drifið er áfram af valdagræðgi og ótta. Öllu hefur verið tjaldað til að kasta rýrð á flokksforystu Samfylkingarinnar og settur af stað mikill hamagangur til að reyna að tala flokkinn niður og gera ótrúverðuga. Hver man ekki níðræðu Davíðs Oddssonar á landsfundi íhaldsins 2001? Upp úr honum rann rógur í hálftíma um Össur. Svo var hægt að fara að tala um pólitík. Sama á sér nú stað.

Blaðran springur
Á sama tíma og ryki er þyrlað í kringum Samfylkinguna er undarleg sú þögn sem ríkir í kringum Geir H. Haarde nýkjörin formann Sjálfstæðisflokksins. Hann hefur bókstaflega horfið af sjónarsviðinu eftir að hafa verið kjörinn formaður sjálfstæðismanna í október. Ekkert hefur komið fram um það hverjar hans áherslur verði í formannsstóli né hefur hann sýnt neitt í verki sem gefur neinar vísbendingar þar um. Á sama tíma hefur hans fólk hinsvegar hamast í forystu Samfylkingarinnar. Það er skrýtin byrjun hjá stjórnmálamanni sem vill vinna sér traust þjóðarinnar til framtíðar. Sú blaðra mun fljótt springa í andlitið á þeim félögum því enginn heldur lengi því fylgi sem byggist á því að tala andstæðinginn niður.
Ósanngjarnt væri nú að segja öll forysta Sjálfstæðisflokksins hefði horfið eftir kjör hennar í október. Þorgerður Katrín hefur nefnilega verið nokkuð áberandi fyrir að koma sér í afar erfið mál þar sem meira hefur verið um innihaldslitlar yfirlýsingar en raunveruleg verk. Eftir haustið loga fleiri bál en nokkru sinni á sviðum mennta og menningar hér á landi.

Samfylkingin sterk
Samskonar óveður hefur nú verið var búið til af Sjálfstæðisflokknum í kringum Ingibjörgu og gert var í kringum Össur eftir að Samfylkingin var stofnuð árið 2000 einsog áður sagði. Voru þær árásir á tíðum afar ósmekklegar og er alveg ljóst að Davíð og íhaldið óx ekki af þeim leiðangri sem rekin var áfram af ótta við Samfylkinguna. Eftir alla orrahríðina og djúpan öldudal í skoðanakönnunum stóð forystan þá uppi sterkari en áður. Ég efast ekki um að ný forysta Samfylkingarinnar með Ingibjörgu Sólrúnu fremsta í flokki mun standa sterkari eftir þessa atlögu eins og Össur gerði á sínum tíma. Spjótalögin munu hitta þá fyrir sem stinga. Svo ósmekklega er að málum staðið og svo innantómt er hjalið

Framtíðarlausnir fyrir leikskólana

2005-11-11T19:39:00.000Z

- Grein birt í Blaðinu 11. nóvember

Mikið hefur verið fjallað undanfarna mánuði um þann vanda sem við stöndum frammi fyrir í leikskólum landsins vegna skorts á starfsfólki til kennslu. Víða á höfuðborgarsvæðinu, til dæmis í sveitarfélaginu mínu Kópavogi, eru börn send heim nokkra daga í mánuði til að mæta þessari vöntun á starfsfólki í leikskólunum. Þetta kemur sér auðvitað illa fyrir alla hlutaðeigandi og veldur miklu álagi á þær fjölskyldur sem fyrir þessu verða að ekki sé talað um þá starfsmenn sem fyrir eru. Í þeim sveitarfélögum þar sem náðst hefur að manna leikskólana er það þó bara rétt svo fyrir horn því víða þarf að senda börn heim ef umgangspestir láta á sér kræla meðal starfsmanna.

Launin skammarlega lág
Þessi vandi er árstíðabundinn og kemur upp á haustin og um áramót. Sumstaðar sleppur þetta fyrir horn og það tekst að manna stöðurnar og sumstaðar ekki. Og það hefur lítið með það að gera hvað sveitarfélagið heitir eða flokkurinn sem heldur þar um stjórnartaumana. Grunnvandinn er nefnilega allsstaðar hinn sami; gríðarleg starfsmannavelta og alltof lág laun. Mér hefur fundist ríkisvaldið sleppa nokkuð létt í gegnum þessa umræðu hingað til því ábyrgð þess er mikil. Til að leysa starfsmannavanda leikskólanna þarf margt að koma til og vil ég í þessum greinarstúf nefna tvö stærstu atriðin: Í fyrsta lagi verða að koma til verulegar launahækkanir fyrir þessi störf sem eru skammarlega lágt launuð og á engan hátt samkeppnishæf. Þar ber ríkisvaldið sína ábyrgð vegna ranglátrar tekjuskiptingar ríkis og sveitarfélaga. Enginn er eyland í þessum efnum og ríkisvaldið verður að fara að axla sína ábyrgð þegar kemur að fjármögnun á verkefnum sveitarfélaganna með því að fjölga tekjustofnum þeirra.

Helmingi umsækjenda vísað frá
Í öðru lagi og samhliða launahækkunum verður að fjölga leikskólakennurum. Hlutfall leikskólakennara við störf í leikskólum er í kringum 34% þeirra sem starfa við kennslu. Á síðasta ári var helmingi umsækjenda um leikskólakennaranám í Kennaraháskólanum vísað frá vegna plássleysis. Þetta er auðvitað óviðunandi ástand þegar það blasir við og hefur gert árum saman að fjölga verður leikskólakennurum verulega. Í umræðum um málið á alþingi í gær skoraði ég á ráðherra að veita auknu fé til leikskólakennaramenntunar því það er svo sannarlega eftirspurn eftir náminu og þörf fyrir þessa menntun í samfélaginu. Svörin voru heldur rýr og taldi ráðherra nú þegar nóg að gert í þeim efnum. Því er ég ekki sammála þegar það er umframeftirspurn eftir náminu á sama tíma og fólk vantar í störf á leikskólum.

Ríkið er ekki stikkfrí
Við þurfum fleiri sem vilja gera störf með börnum í leikskólunum að ævistarfi. Til þess að svo megi verða verður að gera betur við þessa starfsmenn hvort sem þeir eru faglærðir eða ófaglærðir. Það á ekki að vera neitt eðlilegt við það að á þenslutímum streymi starfsmenn útúr leikskólunum í önnur störf. Við verðum að endurmeta hvernig við verðleggjum störf í okkar samfélagi því það er ekkert náttúrulögmál að fólkið sem vinnur með börnunum okkar sé á lægstu laununum. Þetta er allt mannanna verk og þeim er hægt að breyta með pólitískum vilja og samstöðu þeirra sem geta þessu breytt.

Framsókn á villigötum

2005-10-13T17:19:00.000Z

- Grein birt í Blaðinu í dag.

Forsætisráðherra hefur verið tíðrætt um stöðu fjölskyldunnar á Íslandi og stofnað sérstaka nefnd til að huga að málefnum hennar. Fagna ég þessu og er svo sannarlega á mörgum þáttum sem þarf að taka. Það veldur því sárum vonbrigðum að í nýframkomnu fjárlagafrumvarpi eigi annað árið í röð að skerða vaxtabætur. Vaxtabætur eru einmitt mikilvægt tæki til að koma til móts við barnafjölskyldur og létta þeim róðurinn og þá ekki síst þeim tekjulægstu. Lítið samhengi er því milli orða og efnda hjá forsætisráðherranum og hans ríkisstjórn í þessum efnum.

Vaxtabætur eru ekki lúxus
Í fjárlagafrumvarpi ríkisstjórnarinnar á að skerða vaxtabæturnar sem nemur 450 milljónum króna. Í texta frumvarpsins kemur fram að þetta sé í samræmi við áform um aðhald með útgjöldum ríkissjóðs. Fjárlagafrumvarpið er stefnumarkandi plagg. Það er því stefna þessarar ríkisstjórnar að á næsta ári skuli kroppa aurana af unga fólkinu með húsnæðisskuldirnar. Þannig ætlar þessi ríkisstjórn m.a. að mæta eigin hagræðingarkröfu. Ég hefði haldið að skerðing til að mæta áformum um aðhald þýddi að skera ætti niður óþarfa lúxus. Þessi ríkisstjórn virðist því líta þannig á að vaxtabætur vegna húsnæðislána á tímum uppsprengds húsnæðisverðs sé lúxus á venjulegum heimilum íslenskra barnafjölskyldna. Því er ég algerlega ósammála.

Hátt húsnæðisverð
Á barnafjölskyldum hvíla miklar birgðar. Þar vegur þungt hátt matvælaverð, skólagjöld í leiksskóla, gjöld fyrir dagvistun yngri barna í grunnskólum, hár læknakostnaður og þá ekki síst tannlæknakostnaður og nú himinhár húsnæðiskostnaður. Daglegur rekstur heimila þar sem börn búa er afar kostnaðarsamur í okkar samfélagi og margir þættir sem leggjast á eitt við það að þyngja róðurinn. Nú þegar húsnæðisverð hefur rokið upp og skuldir ungra barnafjölskyldna vegna húsnæðiskaupa aukist að sama skapi ætlar ríkisstjórnin sem boðar fjölskyldustefnuna að kroppa í vaxtabæturnar. Á ungum barnafjölskyldum hvílir þung vaxtabyrði vegna húsnæðiskaupa. Og af heildarskuldum ungs fólks er stærstur hluti tilkominn vegna húsnæðiskaupa.

Furðuleg fjölskyldustefna
Ungt fjölskyldufólk þarf að vinna langan vinnudag til að ná endum saman og lítill tími er fyrir samverustundir fjölskyldunnar. Skerðingin kemur sér beinlínis illa fyrir margar barnafjölskyldur sem hafa gert ráð fyrir vaxtabótum við húsnæðiskaup og áætlanagerð heimilisins. Ungt fólk eru ekkert að bruðla eða taka óþörf lán – það er einfaldlega að koma sér og sinni fjölskyldu upp þaki yfir höfuðið. Þess vegna skuldar ungt fólk. Skuldasamsetning ungs fólks hefur sýnt okkur það á undanförnum árum. Ef einhvern tíma ungar barnafjölskyldur hafa þurft fullar vaxtabætur þá er það nú þegar verð á húsnæði hefur náð áður óþekktum hæðum. Boðskapur forsætisráðherra um bættan hag barnafjölskyldna er í þessu ljósi vægast sagt ótrúverðugur og ekkert nema sýndarmennska. Framsóknarflokkurinn er á villigötum og ríkisstjórnin er kominn í hugmyndalegt þrot ef þeim dettur ekkert annað í hug til að skera niður í ríksútgjöldum en að skerða innkomu barnafjölskyldna. Það þykir mér vægast sagt furðuleg fjölskyldustefna sem slíkar aðgerðir rúmast innan.

Nú þarf alvöru lausnir ekki plástra!

2005-09-23T10:41:00.000Z

Mikið hefur verið um að vera síðustu vikur bæði í flokksstarfi Samfylkingarinnar og í undirbúningi fyrir þingið sem hefst aftur þann 1.október n.k. Síðan ég bloggaði síðast hefur verið stofnuð kvennahreyfing Samfylkingarinnar, stofnuð ungliðahreyfing í Mosfellsbæ og mánudagsfundir hjá Samfylkingunni í Kópavogi komnir af stað aftur.

Stofnfundur kvennahreyfingarinnar var haldinn á Hótel Örk síðustu helgi og voru á annað hundrað konur þátttakendur í þeim frábæra fundi. Starf kvennahreyfingarinnar er komið á gott skrið og vil ég benda á vefsíðu sem hefur verið opnuð á slóðinni www.kvennahreyfing.net. Þar munum við samfylkingarkonur skrifa um þau málefni sem helst á okkur brenna hverju sinni auk þess sem talsvert af upplýsingum verður þar að finna.

Ungir jafnaðarmenn stofnuðu félag í Mosfellsbæ s.l. þriðjudag. Samfylkingin mun nú bjóða fram í fyrsta sinn ein og sér í bænum í sveitastjórnarkosningunum í vor. Það var því mikill hugur í mönnum á fundinum og voru sex öflugir einstaklingar kosnir í fyrstu stjórn félagsins. Á fundinum lýstu margir áhyggjum sínum af stöðu dagvistunarmála þar í bæ. Þar er uppi sama staða eins og við höfum heyrt af t.d. í Kópavogi þar sem vantar verulega uppá fjölda starfsmanna til að halda uppi fullri þjónustu við börnin í bænum. Álagið á starfsmenn er því mikið og aðstæður allar alls ekki nógu góðar hvorki fyrir börnin eða starfsmennina.

Hækkum launin
Það hefur óþolandi plástrapólitík verið rekin þegar kemur að dagvistunarmálunum. Ár eftir ár er sami vandi að koma upp bæði á leiksskólunum og á frístundaheimilum grunnskólanna, það vantar fólk og það vantar fólk. Sumsstaðar eru aðstæður svo slæmar að það vantar líka almennilegt húsnæði til að reka þessa mikilvægu starfsemi og það veldur enn meira álagi á starfsmenn og börn sem þar starfa. Stjórnvöld á hverjum stað koma þá fram með reddingar til að fleyta starfinu áfram yfir veturinn en sami vandi kemur síðan alltaf upp aftur.

Firrt gildismat
Við erum öll sammála um nauðsyn þess að reka leikskóla og frístundaheimili. Það er hluti af okkar samfélagi og daglega lífi. Við erum líka öll sammála um að við eigum úrvalsfólk sem þar starfar og við viljum halda því þannig. Ég spyr því hvenær ætla stjórnvöld - bæði í ríkis- og sveitastjórnum - að finna framtíðarlausn svo leiksskólar og frístundaheimili geti starfað með eðilegum hætti? Meðal þess sem verður að gera er að auka möguleika fólks til að fagmennta sig á þessu sviði og hækka launin. Laun þeirra sem starfa með börnunum okkar eru skammarlega lág. Mér finnst þetta lýsa mjög firrtu gildismati. Vegna þess að það góða fólk sem sinnir börnunum okkar með frábæru starfi allan daginn á meðan við vinnum á ekki að vera á lægstu laununum. Þarna er eitthvað verulega mikið að í forgangsröðuninni.

Hvað er það mikilvægasta í lífi okkar og fyrir framtíð þessa þjóðfélags? Það eru jú börnin okkar. Förum þá að sýna það í verki og hefjum störf þeirra sem starfa með börnunum okkar upp til vegs og þeirrar virðingar sem þau eiga skilið!

Ég skora á ríki og sveitarfélög að taka höndum saman og finna framtíðarlausn í sameiningu. Það er eina leiðin.

Vond ákvörðun hjá Þorgerði Katrínu að leggja Listdansskóla Íslands niður

2005-09-08T10:39:00.000Z

Fyrir skömmu lýsti Þorgerður Katrín Gunnarsdóttir menntamálaráðherra því yfir að nýhafinn skólavetur yrði sá síðasti í sögu Listdansskóla Íslands. Þessi yfirlýsing kom okkur öllum í opna skjöldu og hafa þeir aðilar sem að listdansnáminu standa sem og Bandalag íslenskra listamanna mótmælt vinnubrögðum ráðherrans harðlega. Ekkert samráð var haft við fagaðila og ekki liggur fyrir hvað verður um listdansnámið í heild sinni - einungis að hluta þess verði fyrirkomið í framhaldsskólunum. Þetta verða að teljast afar vond vinnubrögð að leggja niður lífæð listdanssins í menntakerfinu án þess að fyrir liggji hver framtíð námsins verður.

Ég sótti opinn fund sem haldinn var um málið í LHÍ s.l. mánudagskvöld og var þar afar heitt í fólki og mikill uggur vegna málsins. Foreldrar barna í skólanum lýstu áhyggjum sínum sem og börnin sjálf auk listdansara og annarra listamanna sem vel til málsins þekkja.

Hvert fer grunnnámið?
Listdansskóli Íslands hefur gegnt mikilvægu hlutverki í menntun listdansara á Íslandi. Þangað geta dansarar framtíðarinnar sótt sína menntun frá unga aldri. Þorgerður Katrín hefur ekki sagt þessum ungu krökkum sem eru á grunnskólaaldri og hafa ákveðið að leggja fyrir sig listdans hvert þau geti sótt menntun sína á því sviði á næsta ári. Það er ömurleg staða fyrir þessa krakka sem eiga sér stóra drauma og hafa fundið sig í listdansinum. Þessir krakkar verða að fá svör frá ráðherranum.

Sérstaða skólans mikil
Það er ruglingsleg framtíðarsýn fyrir listdansnámið ef koma á því fyrir innan veggja grunn- og framhaldsskólanna eins og þeir eru í dag. Í fyrsta lagi vegna þess að kraftar stéttarinnar myndu dreifast óþarflega. Í öðru lagi vegna þess að námið krefst sérhæfðrar æfingaaðstöðu og faglegrar kennslu. Í þriðja lagi hefur listdansskólinn sinnt þeim einstaklingum sem hafa getað og viljað gera þetta "auka" sem til þarf til að leggja listdansinn fyrir sig. Dansnám í skólakerfinu er annars eðlis því þar er það hluti af þroskaferli barnanna og ætlað til að efla líkama þeirra og sál. Listdansskóli Íslands hefur hinsvegar sinnt þeim sem vilja sérhæfa sig á þessu sviði og jafnvel gera listdansinn að ævistarfi. Á því er klárlega mikill munur. Í fjórða lagi er samfella í þessu námi eins og öðru listnámi mikilvæg. Þessi samfella hefur verið til staðar vegna listdansskólans en hefur nú verið sett í uppnám.

Óljós framtíðarsýn
Við eigum frábæra listamenn á sviði listdansins hér á landi. Listdansskóli Íslands hefur verið lykilstofnun í því að mennta þessa listamenn. Nú í haust var síðan tekið upp nám í listdansi á háskólastigi í LHÍ sem er alveg frábær viðbót. Þessi ákvörðun menntamálaráðherra um að kippa fótunum undan grunnnáminu er í því ljósi með öllu óskiljanleg. Ekkert er eilíft og það má vel vera að við einhverjar kringumstæður væri eðlilegt að leggja Listdansskólann niður. En þá er lykilatriði að fyrirliggji hvað eigi að koma í staðinn. Framtíðarsýn ráðherrans er afar óljós ef hún þá er einhver. Ég vona að hún sjái að sér og dragi þessa ákvörðun tilbaka kalli á fagaðila og fari betur yfir málið með það fyrir augum að treysta grunn námsins til framtíðar.

Ég mun taka þetta mál upp þegar þing kemur saman og kalla eftir ástæðum ráðherra fyrir þessari ákvörðun og framtíðarsýn ráðherra á fyrirkomulag listnáms. Svörin hingað til hafa verið heldur haldlítil og einkennst af fullkomnu skilningsleysi gagnvart þessu námi.

Bæta verður stöðu listmenntunar
Staða listmenntunar á Íslandi er ekki nógu góð. Það er engin stefna í gangi af hálfu hins opinbera. Gott dæmi um þetta er tónlistarnámið sem nú er orðið bitbein milli ríkis og sveitarfélaga. Við eigum að draga af því lærdóm en ekki senda fleiri listnámsgreinar inná þá braut. Menntamálaráðherra verður að skoða listnámið heildrænt og marka faglega stefnu til framtíðar í stað stefnu einfalds niðurskurðar og þægilegri stjórnsýslu.

Eftirfarandi ályktun var samþykkt á fundinum á mánudaginn: "Opinn fundur haldinn 5. september í húsnæði Listaháskóla Íslands, mótmælir harðlega einhliða ákvörðun menntamálaráðherra um lokun Listdansskóla Íslands og krefst þess að lokun skólans verði frestað þar til framtíð listdansnáms á grunn- og framhaldsskólastigi hefur verið tryggð í samráði við fagmenn í greininni."

Aðeins um Steinunni Valdísi og Gísla Martein

2005-09-04T09:45:00.000Z

Skrýtið hvernig öll umræðan um borgarmálin er farin að snúast um Gísla Martein. Það er auðvitað frábært fyrir hann - held ég a.m.k. Aðrir frambjóðendur þurfa hinsvegar að lifa við það að geta ekki komið í sjónvarps- eða útvarpsþætti nú eða blaðaviðtöl nema sitja uppi með það þurfa að vera svara spurningum um framboð Gísla og hafa á honum einhverja sérstaka skoðun umfram aðra frambjóðendur. Það finnst mér skrýtin staða fyrir þetta ágæta fólk sem er búið að lifa og hrærast í borgarmálunum yfir áratug í sumum tilfellum. Gísli Marteinn hefur ekki setið í borgarstjórn nema sem varamaður og því ekki mikið vitað um hans áherslur og þetta ágæta fólk líklega lítið starfað með honum. Hvernig geta þessir reynsluboltar haft skoðun á manni sem er nánast óskrifað blað í borgarmálaumræðunni?

Ég hef verið afar ósátt við það hvernig vegið er að Steinunni Valdísi borgarstjóra í fjölmiðlum og annarsstaðar undanfarið. Hún hefur fengið afar ósanngjarna meðferð og fólk virðist búið að gleyma því að hún er ein þeirra sem hefur starfað lengst innan Reykjavíkurlistans eða frá því að hann tók við borginni 1994. Hún á því skilið að rætt sé um árangur hennar sem borgarfulltrúi í öll þessi ár. Þau góðu verk sem R-listinn kom til leiðar eru ekki síst Steinunni að þakka - þessu mega menn ekki gleyma í öllu atinu við að koma sjálfum sér að. Mér finnst hún einnig hafa staðið sig vel sem borgarstjóri og finnst asnaleg og ósanngjörn sú umræða að hún hafi verið einhver millileikur. Staðreyndin er sú að henni var treyst innan Rvk - lista samstarfsins til að sitja í stóli borgarstjóra vegna reynslu sinnar og þekkingar og án efa vegna þeirrar tryggu persónu sem hún hefur að geyma. Gat ekki látið hjá líða að segja um þetta nokkur orð því af þeim sem nú sækja á fyrstu sætin hjá öllum flokkum sem bjóða munu fram í borginni hefur Steinunn líklega komið hvað mestum umbótum í framkvæmd fyrir borgarbúa.

Í lokin verð ég að nefna það að ég skil ekki alla þessa umræðu um aldur Gísla Marteins. Mér finnst hann ekkert ungur enda er hann nokkrum árum eldri en ég. Giftur og ber þá miklu ábyrgð að ala upp tvö börn. Ég vona að fólk hætti að velta sér uppúr aldri hans og fari að kalla eftir svörum við því hvað hann ætli sér að gera fyrir borgarbúa. Það er það sem skiptir máli.

Bling Bling sigur í KUBB

2005-09-04T08:29:00.000Z

Tók þátt í Íslandsmótinu í KUBB sem haldið var í Borgarnesi í gær (laugardag). Fengum frábært veður, sól og blíðu allan tímann. Um 20 lið mættu til leiks og var mikið fjör. Ég hef áður tekið þátt í svona mótum en þetta mót var af þeim alveg einstakt því í fyrsta sinn voru veittar viðurkenningar fyrir flottustu búningana, skemmtilegasta liðið, glyðrur mótsins, mesta 101 liðið, lang óheppnasta liðið og skemmtilegasta liðið. Flest liðin mættu því í afar metnaðarfullum búningum og var gaman að horfa yfir hópinn sem var ýmist klæddur eins og víkingar, glimmerstráð samkvæmispör, rapparar, póló-snyrtimenni og fleira skemmtilegt. Liðið mitt "Í rauðum sokkum" var eina hreina kvennaliðið í keppninni og vorum við klæddar í anda kvenna í frönsku andspyrnuhreyfingunni. Ég verð að segja að þessi nýjung setti skemmtilegan brag á keppnina í ár. Einnig var brugðið á leik og víkingarnir í hópnum settu margt skemmtilegt á svið fyrir okkur.

Liðið Bling Bling vann mótið í ár með miklum glæsibrag eftir spennandi úrslitarimmu við KOMATSU sem þau hjónin Hreinn Hreinsson og Halldóra Gunnarsdóttir skipa. Mínu liði gekk svona lala við komumst ekki uppúr riðli en áttum engu að síður góðan endasprett þegar við sigruðum Hringhorna sem urðu í fjórða sæti í keppninni. Sú viðureign við þá félaga endaði í bráðabana sem við sigruðum. Við fengum þó viðurkenningu sem glyðrur mótsins þetta árið, komum því ekki heim alveg beygðar. Við Jóhanna Þórdórs og Hólmfríður Sveins sem voru með mér í liði komum hinsvegar sterkar til keppni að ári og stefnum á sigur á mótinu!

KUBB er góð fjölskylduskemmtun og var því mikið af börnum með okkur í Borgarnesi í gær sem stóðu sig eins og hetjur í nokkrum liðanna. Júlíus ákvað að horfa á í þetta skiptið en heillaðist svona líka af spilinu að hann ætlar að hefja stífar æfingar og taka þátt á næsta ári! Nánari upplýsingar um KUBB er að finna á slóðinni www.folk.is/kubb

Horfðum á Stelpurnar á Stöð 2 eftir að við komum heim í gærkvöldi. Mér fannst þetta bráðskemmtilegt og hlakka til að sjá næsta þátt. Júlíus skildi nú ekki endilega alla brandarana en hann hló sig máttlausan þegar Brynhildur Guðjóns birtist á skjánum sem hin ofurákveðna breska húsmóðir. Enda listavel gert hjá henni.

Cherie Blair - Þórsmörk - Veikindi

2005-08-31T10:11:00.000Z

Fór og hlustaði á Cherie Blair á mánudagsmorguninn þar sem hún var að fjalla um stöðu og réttindi/réttindabaráttu kvenna í veröldinni á ráðstefnu menningarmálaráðherra af kvenkyni. Hún var auðvitað alveg frábær og var erindi hennar mjög áhugavert og til fyrirmyndar hvernig það var fram sett. Ég ætla nú ekki að endurtaka það hér enda hefur því verið gerð góð skil í fjölmiðlum undanfarna daga. En ég get ekki annað en skrifað nokkur orð um hversu heppnar við konur erum að eiga svona frábæran talsmann fyrir réttindum okkar. En hún hefur lengi barist fyrir bættum kjörum kvenna um heim allan og þegar hún flutti sitt erindi sá maður að hversu nærri hennar hjarta þessi mál standa.

Saga konu af heimilisofbeldi
Hún hefur í heimalandi sínu, Bretlandi, lengi barist gegn heimilisofbeldi og verið í fararbroddi samtaka sem vinna gegn heimilisofbeldi. Vorið 2001 fór ég ásamt félögum mínum Björgvini G. Sigurðssyni og Hreini Hreinssyni til London til að taka þátt í kosningabaráttu Verkamannaflokksins. Þrömmuðum við húsa á milli í kjördæmi sem heitir Fulham/Hammersmith í London í nokkra daga með boðskapinn (og bjagaðan breskan hreim). Ein heimsókn er mér afar eftirminnileg en við höfðum skipt okkur og fórum milli húsa og bönkuðum uppá til að hvetja fólk til að fara út og kjósa. Kem ég að húsi einu og banka - til dyra kemur kona sem þarf að styðja sig við tvær hækjur og mátti strax sjá að þarna var kona sem hafði lent í einhverju hræðilegu á ævi sinni því utan þess að styðjast við hækjur var hún alsett sýnilegum örum. Hún bauð mér inn og sagði mér sögu sína. Hún hafði verið gift manni sem beitti hana skelfilegu ofbeldi. Hún hafði reynt að leita til yfirvalda og fá hjálp en fékk ekki og var alltaf send heim og sagt að reyna að laga hjónabandið. Í örvæntingu sinni leitaði hún eitt sinn til þingmannsins síns sem þá var úr breska íhaldsflokknum og bað hann um aðstoð við að komast frá ofbeldisfullum manni sínum. Þessi ferð sagði hún að hafi verið ein mesta niðurlægingarferð sem hún hafi farið. Þingmaðurinn sendi hana heim og sagði að hann gæti ekkert gert - þetta væri mál sem þyrfti að leysa innan veggja heimilisins! Eftir áralangar barsmíðar lamdi eiginmaður þessarar konu hana svo illa að hún lenti þungt haldin á sjúkrahúsi og hefur stuðst við hækjur síðan þar sem hún mölbrotnaði og varð alvarlega fötluð í kjölfarið. Ég stóð inni hjá konunni og barðist við tárin og reiðina sem blossar uppí manni við að heyra af svona ömurlegum örlögum sem hefði verið hægt að grípa inní hefði einhver hlustað. Alltof algengt. Síðan sagði hún mér hversu margt hefði breyst í hennar lífi eftir að Verkamannaflokkurinn tók við. Fyrir hana sem fórnarlamb heimilisofbeldis hafði líf hennar tekið stakkaskiptum fjárhagslega og andlega þar sem hún fær nú mikinn stuðning. Allt þetta þakkaði hún Cherie Blair sem hún sagði að hefði lyft umræðunni um heimilisofbeldi uppá annað stig - stig þar sem tekið er mark á konum sem fyrir því verða. Hún sagði mér síðan frá því hvernig Cherie Blair hefði unnið gegn heimilisofbeldi og þakkaði henni það að umræðan færi nú fram fyrir opnum tjöldum og hægt væri að leita sér aðstoðar og stuðnings. Hún þakkaði henni þó aðallega að stjórnmálin væru nú farin að fjalla um heimilisofbeldi sem samfélagslegan vanda ekki vanda heimilanna sjálfra.

Ég hafði ekki velt Cherie Blair mikið fyrir mér fram að þessari heimsókn - var einlægur aðdáandi manns hennar. En uppfrá þessari heimsókn fékk ég algerlega nýja sýn á þessa merku konu og hef verið einlægur aðdáandi hennar sjálfrar og tel að maður hennar væri ekki mikið án hennar! Örlát kona með hjartað á réttum stað.

Þórsmörk
Fór í aldeilis frábæra ferð í Þórsmörk á laugardaginn síðasta. Tilefnið var árleg sumarferð Samfylkingarinnar. Fengum alveg dásamlegt veður - sól og blíða - frá því við lögðum af stað klukkan átta um morguninn og þar til við komum í bæinn um klukkan tíu um kvöldið. Ég hef aldrei séð Þórsmörkina í svo fallegu veðri. En svo mikil stilla var að þegar við komum akandi að Seljalandsfossi sáum við inní Vestmannaeyjabæ og það var eins og land og eyjar væru eitt því sjórinn var alveg spegilsléttur. Okkur leið eins og við gætum keyrt yfir. Milli þrjú- og fjögurhundruð manns fóru í ferðina og fylltum við átta rútur. Þetta var alger úrvalsfélagsskapur. Farið var í gönguferðir, grillað og brugðið á leik. Eins og sjá má af þessum skrifum er ég enn í skýjunum yfir ferðinni. SJÁ MYNDIR....

Veikindi
Júlíus fór loksins í skólann í morgun en hann er búinn að liggja veikur síðan s.l. miðvikudag. Hann fór í skólann þann dag, sem var fyrsti dagurinn hans en lagðist í magapest um kvöldið. Greyið var ferlega spældur að missa af 4 dögum í byrjun skólagöngunnar og var því himinlifandi að hitta vinina í morgun. Þetta var engin smápest sem olli því að litla flísin missti 10% af líkamsþyngd sinni! Við enduðum síðan á sjúkrahúsi á sunnudaginn þar sem hann þurfti að fá vökva í æð þar sem hann var orðinn alveg þurr og tómur því hann hélt engu niðri. En hann er orðinn eldhress núna og hans aðalvandamál er histerísk móðir hans sem er endalaust að reyna að troða ofan í hann mat!

Hafði aldrei áður komið á barnaspítalann og verð að segja að það sem ég sá af honum er stórglæsilegt. Fallegt og þægilegt umhverfi og úrvalsþjónusta við yngstu borgarana. Vil því nota þetta tækifæri og þakka hjartanlega fyrir okkur!

Litli stúdentinn og rándýr skólagangan

2005-08-25T10:44:00.000Z

Í gær byrjaði skólinn hjá syni mínum samkvæmt stundaskrá. Þetta var mjög skrýtinn dagur - gekk klökk út úr skólanum eftir að hafa fylgt honum þangað árla morguns. Ég var að senda barnið mitt út í hinn stóra heim! Hann var voða glaður eftir daginn og ég er ekki frá því að honum hafi verið nokkuð létt þar sem mikið hafði verið látið með þetta og hann búinn að bíða lengi. Ég er að rifna úr stolti eins og fjölskyldan öll. Hann er ekki kallaður annað en litli stúdentinn þessa dagana og ber þá nafnbót svo sannarlega með sóma á sinn eigin yndislega hátt:)

Það er þó ekkert grín að senda 6 ára barn í skóla. Fyrir utan tilfinningasveiflur yfir þessum merku tímamótum þá er þetta rándýrt. Í fyrsta lagi þarf að kaupa skólatösku sem ekki kostar neina smáaura fyrir svona kríli. Síðan fær maður langan lista yfir hluti sem þurfa að vera í töskunni og get ég giskað á að startpakkinn sé ekki undir 12.000 krónum og geti farið uppí 20.000 krónur. ATH. þetta er fyrir eitt barn! Fyrir utan þetta þarf að klæða barnið upp, kaupa úlpu, vettlingana, húfuna, skóna, og ég veit ekki hvað og hvað svo barnið geti byrjað nokkuð snyrtilegt í skólanum og verði ekki kalt í íslensku vetrarveðri.

Hár mánaðarlegur kostnaður
Í þriðja lagi og síðast en alls ekki síst þá er mánaðarlegur kostnaður töluverður fyrir foreldra grunnskólabarna a.m.k. á yngsta stigi. Nærtækt dæmi: fyrir mig sem einstæða móður eru mánaðarlegar greiðslur til skólans nánast þær sömu og til leikskólans. Ég stóð í þeirri trú að þegar í grunnskólann væri komið kæmist maður útúr þessu gjaldabúri sem við foreldrar erum sett í af hinu opinbera. En ónei nei aldeilis ekki maður er enn fastur. Það sem greitt er fyrir er annars vegar heiti maturinn í hádeginu og hins vegar Dægradvöl eftir að kennsla skv. stundaskrá hættir klukkan 13.15. Flest börn fara í Dægradvöl af því að flestir foreldrar vinna úti fullan vinnudag. Umhverfi barnafjölskyldna er þannig í íslensku samfélagi að allar fullorðnar hendur hvort sem eru tvær eða fjórar þurfa að vera uppi á dekki vinnumarkaðarins svo heimilið nái endum saman. Að auki þarf auðvitað að senda barnið með ávexti daglega og greiða fyrir mjólkina sérstaklega. Safnast þegar saman kemur.

Það er bara ekki í boði
Barnmargar fjölskyldur standa því frammi fyrir verulegum útgjöldum vegna skólagöngu barna sinna, lögbundinnar skólagöngu og mikilvægrar í þroskaferli þeirra sem einstaklingar. Það er blekking að grunnskólinn sé gjaldfrjáls því samanlagður kostnaður er gríðarlegur vegna skólagöngunnar. Foreldrar hafa lítið val því börnin þurfa góða tösku ef bakið á þeim á ekki að bogna undan henni, börnin þurfa að mæta með skólavörur í skólann svo þau geti tekið þátt í starfinu, börnin þurfa að vera sæmileg til fara svo þeim verði ekki kalt, börnin þurfa hádegismatinn bæði svo þau skeri sig ekki úr ef þau mæta ein með nesti og þau þurfa heita og væna máltíð svo þau haldi kröftum yfir daginn, yngstu börnin þurfa gæslu eftir hádegi þegar skólinn er búinn og foreldrarnir að vinna. Ekki er hægt að setja lykla um hálsinn á þessum krílum og láta þau ráfa um götur bæjarins eftir skóla. Það vill það enginn. Við viljum án ef flest okkar komast fyrr heim úr vinnunni á daginn og vera lengur með börnunum. Það er bara ekki í boði. Dægradvölin er því hluti af skólanum, mikilvægur hluti. Ég sé ekki að foreldrar hafi mikið val í þessu.

Álag á barnafjölskyldum
Það er mikið á barnafjölskyldur lagt í þessu landi. Margir kostnaðarliðir vega þungt í heimilisbókhaldinu einsog húsnæði, tannlæknar, matur, endurgreiðsla námslána svo fátteitt sé nefnt. En að skólaganga barnanna okkar sé svo stór kostnaðarliður í heimilisbókhaldinu í ofanálag finnst mér verulegt áhyggjuefni. Íslenskt samfélag er á rangri braut í málefnum fjölskyldna. Skólaganga á ekki að hafa sligandi áhrif á fjárhag fjölskyldna heldur vera ánægjuleg uppbygging kynslóða framtíðarinnar.

Frábært skólastarf - menntun í fyrstu sætin
Þó ég sé neikvæð hér fyrir ofan þá verð ég auðvitað að koma inná það að skólastarfið er algerlega frábært og mér líst afar vel á Dægradvölina og þá þjónustu sem þar er veitt. Sonur minn er afar ánægður og mamman líka því frábærir starfsmenn skólanna hugsa vel um börnin okkar úti í hinum stóra heimi skólanna. (Mín skoðun er líka sú að þessu góða fólki sé ekki borgað nógu vel fyrir störf sín en það er efni í löng skrif enn.)

Engin spurning að þetta er mál sem ég mun beita mínum kröftum í á þingi í þeirri veiku von að Sjálfstæðis- og Framsóknarmenn hlusti (sem þeir gera alltof sjaldan). Treysti á ykkur að byrja að mótmæla þessu með mér því við eigum ekki að sitja þegjandi undir þessu. Ég vil samfélag þar sem menntun og sjálfsstyrking barna okkar er í fyrstu sætum yfir samfélagsleg verkefni án þess fylgifisks að fjárhag fjölskyldunnar sé sniðinn enn þrengri stakkur.

Fáránleg skömmtun réttinda til samkynhneigðra

2005-08-06T11:06:00.000Z

Við Júlíus erum að fara í Gay Pride gönguna á eftir. Við erum voða spennt enda er þetta rosalega flott ganga og mjög skemmtilegt að upplifa. Mér finnst óvenju mikil umræða hafa orðið í aðrdraganda Gay Pride í ár um réttarstöðu samkynhneigðra í íslensku samfélagi. Því ber að fagna. Ég held að beitt grein Baldurs Þórhallssonar sem hann birti á vefritinum Sellan s.l. fimmtudag spili þar stóra rullu. Ég hvet alla til að lesa þessa grein. Mér hefur alltaf fundist afar undarlegt að samkynhneigðir njóti ekki sömu réttinda og gagnkynhneigðir. Samfélaginu er stýrt af gagnkynhneigðu fólki sem hefur hingað til gefið sér það að samkynhneigðir séu síðri uppalendur en gagnkynhneigðir. Þetta hefur birst í því að samkynhneigð pör mega ekki frumættleiða. Einstæðir mega það en ekki samkynhneigð pör. Samkynhneigð pör mega heldur ekki fara í tæknifrjóvgun til þess að geta barn - heldur verða að leita út fyrir landssteinana.

Samkynhneigð pör eru alveg jafnfær og einstæðir og gagnkynhneigð pör til þess að ala upp börn í okkar samfélagi. Að halda öðru fram eru fordómar af verstu sort. Grundvallaratriði er að börnin okkar fái að alast upp á öruggum og hlýjum heimilum og þá skiptir ekki máli hvernig samsetning fjölskyldunnar er. Borist hafa fregnir af því að nú ætli ríkisstjórnin að leggja fram frumvarp/frumvörp nú á komandi haustþingi sem bæta eigi réttarstöðu samkynhneigðra. Samkvæmt fréttum ætlar ríkisstjórnin þó ekki að ganga alla leið og veita samkynhneigðum pörum sama rétta og öðrum. Það hryggði mig að heyra því ég tel ekki nokkur rök á bakvið það að veita sjálfsögð réttindi í smáskömmtum eins og verið sé að gera einhverja greiða og sýna vald sitt. Þannig hefur það verið hingað til - samkynhneigðum hafa verið skömmtuð réttindi úr hnefa þeirra sem með völdin fara. Þannig er illa farið með völdin og ekki frjálslyndu lýðræðisríki til sóma. Ég vona því að nú sé sá tími kominn að gengið verði alla leið í eitt skipti fyrir öll og vona að sú ríkisstjórn sem nú situr muni gera það. Réttindabarátta samkynhneigðra á minn stuðning heilann (get fullyrt að það sama eigi við um allan þingflokk Samfylkingarinnar) og mun ég leggja mig fram um að ná fram þeim sjálfsagða hlut að samkynhneigð pör hafi sama rétt og einstæðir og gagnkynhneigð pör!

Annars erum við Júlíus búin að eiga góða viku. Júlíus var í fótboltanum hjá HK hálfan daginn og þvældist síðan með mér eða lék við vini sína. Ég vann, setti upp þetta ágætis blogg, heimsótti vini, barðist við tölvuvírus, fór í ræktina, út að hlaupa og í strípur. Að fara í strípur er alltaf dálítið event fyrir mig bæði því ég fer alltof sjaldan (var orðin gulhærð núna) en þó aðallega vegna þess að hárgreiðslukonan er einnig ein mín besta og elsta vinkona Berglind Bragadóttir. Við Berglind eigum 21 árs vinkonuafmæli í september og hefur vináttan milli okkar alltaf verið sterk og einlæg. Við kynntumst fyrsta daginn okkar í 10 ára bekk í Snælandsskóla í Kópavogi en við vorum þá báðar nýjar í skólanum. Við höfum fylgst að allar götur síðan ásamt fleiri vinkonum sem bættust í hópinn í Menntaskólanum í Kópavogi. Við Berglind ætlum því að fagna þessum áfanga með því að fara grand út að borða og kannski eitthvað fleira í byrjun september. Halda uppá þennan merka áfanga. Ég hlakka óskaplega til enda ef tilefni er til að fagna einhverju þá er það góð vinátta!!

Eitt skemmtilegt atvik stendur einnig uppúr þessari viku. Ég mælti mér mót við minn gamla vin og félaga Hrein (útleggst á ensku: Mr.Fred) á Kaffitári í Bankastræti á fimmtudagsmorguninn klukkan 09.00. Ég hef ekki komið þangað síðan ég hætti að drekka kaffi fyrir einu og hálfu ári. Mikið rosalega var gaman þar í morgunkaffi. Staðurinn var eins og umferðamiðstöð. Allskyns fólk að sækja sér kaffi til að taka með á leið í vinnuna - mér leið einsog ég væri stödd í stórborg. Og það besta var að það sást ekki stress á neinum - var reglulega góður andi þarna. Ég hitti fjölmarga kunningja og lenti í skemmtilegum samtölum. (hitti meira að segja bæði Mörtu og Krísu þann klukkutíma sem ég sat þar - hverjar eru líkurnar?:))

Hvet alla til að skella sér í gönguna á eftir. Hún byrjar klukkan 15.00 við Hlemm.

Heilinn fór með gestinum

2005-08-03T20:18:00.000Z

Við Júlíus áttum einstaklega ljúfan dag í dag. Hann fór í fótboltaskólann í morgun rétt fyrir 9 og ég fór að sinna vinnu minni við tölvuna heima. Það var svona eitt og annað sem ég þurfti að gera s.s. svara tölvupóstum ofl. Klukkan 11 kom síðan ljósmyndari frá einu blaðanna vegna lítils viðtals við mig sem birtist á morgun. Þegar hann var farinn þá var eins og heilinn á mér hefði farið með honum. (Er auðvitað ljóska og gæti sjálfsagt hafa truflast af flassinu;)) Anyways til að ná sambandi við tölvuna og ná fókus aftur ákvað ég að skella mér inn á zone.msn.com og spila einn tölvuleik. Við þetta hvarf klukkutími - já klukkutími og hefði ég ekki hrokkið í kút vegna þess að tími var til kominn að sækja Júlíus í fótboltann þá er ég viss um að dagurinn hefði getað horfið í þetta. Þetta kom því ekki bara niður á vinnunni hjá mér heldur var ég næstum búin að gleyma barninu líka!

Magnaðir svona þrautaleikir sem maður hreinlega hverfur inní. Ekki það að þeir eru stórskemmtilegir og nokkuð afslappandi - svo ég viðurkenni það nú alveg hreinskilnislega. Maður verður bara að vita þegar þeir eru opnaðir hvort maður geti séð af öllum þeim tíma sem í þetta fer. Annars er hætt við að eitthvað sem átti að hjálpa manni að slappa af og flýja veröldina í smástund - verði að einu stóru samviskubiti. **

Við Júlíus fórum síðan í stutta heimsókn til Þórlaugar og Kilians litla sem er pínulítil nýfædd rófa. Ég er ekki frá því að ákveðin hljóð hafi komið í ákveðna stokka í ákveðinni konu sem var í heimsókn á þessum ákveðna stað á þessum ákveðna tíma (uss uss - say no more say no more):)

Ræktin tók síðan við og fór Júlíus í barnapassið á meðan ég kláraði nýja prógrammið með þjálfaranum góða. Ég er alltaf með hálfgert samviskubit yfir því að skilja hann eftir á meðan ég sprikla. En barnið er hvergi ánægðara en í leikherbergi með fullt af öðrum krökkum og skemmtir sér konunglega. Skil því ekki af hverju þetta samviskubit kemur alltaf upp því hann klappar saman höndum og veiar þegar barnagæslan er nefnd. Verð því að setja það á markmiðalistann að losna við þetta króníska samviskubit sem engum gagnast sem fyrst!

Síðast og alls ekki síst fórum við Júlíus og hittum Ellý og strákana hennar á Salatbar Eika. Þar borðuðum við rosalega ljúffengan kvöldverð. Frábært hlaðborð sem allir finna eitthvað á og skilar manni mettum en léttum inní kvöldið. Félagsskapurinn var líka frábær og voru Ármann og Einar Alex svo sætir að lána Júlíusi magnað litasett með sér heim. Ungi maðurinn situr því núna og teiknar og litar eins og á akkorði myndir af löggubílum og öryggisgæslubílum (sem eru ekki síður mikilvægir bílar sko:))

**Fyrir þá sem vilja vita heitir umræddur leikur Zuma og er algert brill. Annars eru margir góðir leikir undir flipanum free webgames. Njótið og ekki skamma mig þegar tíminn hverfur - ég varaði ykkur við!

Einkasonurinn á leið í skóla

2005-08-02T22:39:00.000Z

Rosalega líður tíminn hratt. Mér finnst svo stutt síðan að Júlíus var kornabarn og nú er hann að byrja í Snælandsskóla 22.ágúst. Fórum því í dag og keyptum skólatösku og aðrar nauðsynjar fyrir skólagöngu 6 ára barns. Úff það kostaði sitt en litli kútur var svo glaður með dótið sitt að brosið hans og sönglið gerði þetta vel þess virði. Hann er rosalega spenntur að byrja þó að mamman sé dáldið kvíðin - hann er jú lillinn minn!. Þetta eru merkileg tímamót í sögu okkar litlu fjölskyldu þannig að þessi mánuður mun án efa varðveitast í minningunni sem skólamánuðurinn mikli.

Júlíus byrjaði aftur í fótboltaskóla HK í morgun. Þegar ég var búin að fylgja honum í Fagralundinn í Fossvoginum fór ég og hljóp einn hring í Fossvogsdalnum. Það var alveg frábært þrátt fyrir grenjandi rigningu. Kom heim rennandi blaut en ótrúlega fersk. Hlaupin eru liður í átakinu sem ég er búin að vera í síðustu mánuði. Átakið gengur vel og finnur maður það ótrúlega fljótt hversu vel gott mataræði og fjölbreytt hreyfing skilar sér á líkama og ekki síður sál. Seinnipartinn fór ég í ræktina og hitti þjálfara sem fór með mér yfir stöðuna og kenndi mér fleiri æfingar í tækjum. Það var mjög gott og uppörvandi að hitta fagmann á þessu sviði og bæta þannig við þekkinguna. Mæli hiklaust með þessu!

Tókum síðan rólegt kvöld mæðgin og fórum snemma að sofa enda langur dagur framundan í vinnu og fótbolta.